رسالة تضامنية من الفنان سميح شقير لمخيم اليرموك

هذا مخيم اليرموك
شو فكركن انتو
هون تقاطع مصير الفلسطينيين اللي عم يدوروا عن وطن
مع مصير السوريين اللي عم يدوروا عن معنى وطن جوا الوطن
والمخيم بزحمته ، ببيوتو المتعمشقة على بعضها
، بعشوائياته، بالفقر المتجول وين ما كان ، بفروع الجبهات الفلسطينية بالناس اللي بتعرف بعضها
، بتنوع اللهجات والثقافات ، بقبول الآخر
المختلف احياناً بالفكر والدين وطريقة حياة لكن .. مخيم اليرموك قدر يصهر كل هالناس ويخرج من مدرستو العظيمة المناضلين والشعرا والحالمين
بالعودة لفلسطين او للشام اللي بتحب ولادا وما بتنثر الفقرا منهن عأطرافا البعيدة جوعانين للحرية ، بشوارع المخيم طلعنا مظاهرات ضد كل عدوان وضد كل مجزرة ساواها الاحتلال ضد كل معاهدة فرطت بالحقوق ،،. وهتف المخيم للمقاومة حتى انبح الصوت وكل فكرو انو عم يهتف للمقاومة ، لكن بزواريبها يا ما لاحق الأمن المعارضين للنظام واللي كانوا مع المقاومة من قبل ما يصير في مين يحتكر خطاب المقاومة وياما نشر النظام مخبرين لكن كتير بيوت انفتحت للهربانين من المعارضين وهالابواب يلي ما بتعرفهن حمتهم وخبتهم لانها شمت ريحة الوطن فيهن وكذبت مين
خونهم ولاحقهم ليرميهن بالسجون ،
هذا هوي المخيم اللي انا سكنت فيه سبع سنين
هنيك عدوار فلسطين ببيت ام محمد الفلسطينية ببيت صغير بيطل على منور لكن بهالبيت الصغير
التموا شعرا وسياسيين عشاق وموسيقيين وغنى فيه أصدقائي كوكب حمزة وسامي كمال وشباب وصبايا فرقة الارض وفرقة بيسان وأنشد فيه القصايد
ممدوح عدوان ورياض الصالح الحسين واحمد فؤاد نجم وغسان زقطان وجميل حتمل وحسان عزت ومظفرالنواب اللي كان بعد الشعر عم يغنيلنا وجه الصبح وعيطوا علينا الجيران
واسكتتهم ام محمد ، وسهر بهالبيت جبريل عوض وهيثم حقي ومحمد ملص وأسامة محمد ومئات الحالمين بالتغيير وبالحرية ومرقوا منو اصدقائنا الملاحقين بأسمائهن المستعارة وتركوا حكاياتن معلقاعلى الحيطان ،
هذا هو مخيم اليرموك
وهي شارع لوبية وهي سينما النجوم بكراسيها المخلعة لكن معباية ذكريات وحماسة وأغاني ،
هذا هوي مخيم اليرموك المحاصر اليوم
واللي الناس عم يموتوا فيه من الجوع اذا مش من القصف والرصاص
اللي وقفوا عالحياد ماتوا
واللي ساندو الثوار ماتو
والأغراب اللي فرضوا نفسن .. ماتوا
والأطفال يل ما قتلهم الرصاص جاعوا كتير .. وماتوا
وكتير من الجنود اللي محاصرين المخيم ماتوا

ولانو النظام طلع ما بيعرف غير لغة وحدة هيي
لغة النار
صار اللي صار
انا بعرف انو شو ما صرخنا مش حيردوا
بس مافيي إلا ما أصرخ مع كل اللي عم يصرخوا
بيكفي
في ناس جوا عندهن فرصة يعيشوا
ارفعوا الحصار عن مخيم الكرامة والمناضلين
والحلم الضايع والمتروك
ارفعوا الحصار عن مخيم اليرموك